Zurück zur Hauptseite

 

 

  Volkstruerdag

 

 

Den Sönndag vör Dodensönndag hebbt wi den Volkstruerdag. Een Dag, an den man an de Opfer vun den Nationalsozialismus un an de Doden vun de beiden Weltkriege denken schall, so steiht dat in't Lexikon.
Aver een Kriegerdenkmal is doch ok een Mahnmal, dat uns an dat unsinnige, ja wahnsinnige Doon vun Menschen erinnern schall, dormit sik in de Tokunft de lege Geschicht nich wedderhoolt.
So ward jedenfalls ümmer seggt, wenn de Wunden noch frisch sünd un een Kriegerdenkmol inwieht ward. Dat is Bruukdom — weltwiet.

Aver denk mol, denkmol na, un kiekt in de Tied torügg. Alls wat an so een Denkmol snackt ward — egaal ob dat nu inwieht oder wenn later vun de Helden Kränze daalleggt ward — sünd nix as scheune Wöör vun Menschen, de sik wichtig dücht un nie wat anners doon hebbt, as den Moment to leben un de Tied na de Snuut to snacken.
Een good Bispeel: As dat Erinnern an den 2. Weltkrieg noch lebennig weer un de 'Nie wieder Krieg'-Rufe noch nahall'n, hett mol een Politiker seggt. 'Lieber laß ich mir die rechte Hand abhacken, als daß ein Deutscher wieder gezwungen wird, gegen seinen Willen eine Waffe in die Hand zu nehmen'.
Een paar Johr later weer he Minister för de Verteidigung. Un junge Lüüd, de sik gegen dat Sudaat warrn towehr setten, weern em een Doorn in't Oog — weern de letzte Dreck.
Un nu denk mol, denk mol na! Wat hebbt de velen Kriegerdenkmale, de na den 1. Weltkrieg opstellt worrn sünd, as Mahnmale beschickt? Wer hett 1939, as de 2. Weltkrieg für de Döör stunn, noch doran dacht, oder doran to erinnern waagt, wo unsinnig de 1.Weltkrieg ween is, woveel Not un Elend he de Menschen broocht hett, un wovele Menschen för den Kaiser un dat Grootmannsdenken vun sien Feldmarschalle op den Rest noch unsinnig dat Leben verlor'n hebbt.
Wiß, een Kriegerdenkmal hett as Erinnerungssteen an een Menschen, den man leev hat hett, den man verlor'n hett, sien Wert. Doch wenn an Volkstrauerdag, an so een Monument Kränze afleggt un Krokodilstraan weent ward, is so een Denkmal as Mahnmal wertlos.

Zurück zur Hauptseite