Siet söß Jahr weet de Lüüd von den schleswig-holsteenschen Landdag, in den vele Juristen een groot Wort snackt, dat een groot Deel vun dat 'verfassungswidrig' is, wat se sik Maand för in de Tasch steekt.

Siet söß Johr hebbt se döröver nagrüvelt, wodännig se de 'verfassungswidrigen' Gehälter legaliseer'n könnt. Nu, na een Fehlstart, hebbt se dat torecht.

Un nich blots dat, se hebbt, dat weer een Afwaschen, sik ok noch mol eben na eegen Reken een Bedrag vun 1,21 Millionen Euro op dat eegen Konto schüffelt. Ob de Summ an End ok stimmt, läät Twiefel to. Denn bither is achteran ümmer alls dürer worrn, as disse Lüüd vörher utreekt hebbt. Dorum liggt dat nääg, dat de Diätenreform dat Land an de twee Million kosten ward.
Dat is een Reform! un dorto noch de erste siet vele Johrn, de nich dat Inkaam'n vun den Dörchschnitts-Bundesbörger kürzt, sondern een goden Fischtoog för Landdagsabgeordneten is.

Süh, un wenn uns de Landdagspräsident denn ok noch vertellt, dat de niede Regel för de Altersbezüge, de mit in dit Reformpaket inpackt is, sik mit de Johrn för dat Land betohlt maakt, denn kann ik blots segg'n: Wat för een Trost! Erstmol kost se noch Geld. Wat aver mit de Tiet dorut ward, steiht in de Sterns un liggt in de Hann'n vun de Juristen in den Landdag, de bither mit wenig Fingerspitzengeföhl dat Grundgesetz behannelt hebbt.

Un noch een Deel, över dat ik den Kopp schüttel. Över all in't Leben hett de Dübel good lachen, wo dat Negative för den Menschen Bispill is. Süh un wenn nu enkelte Lüüd ut den Landdag, mit brede Bost un sülbstgefällig den Griff in de Staatskass dormit rechtferdigt, dat de Lüüd in annere Landdaag noch veel düller togrepen hebbt, denn erinnert se mi an een…?, de Luuthals schriggt: Dor leept de Spitzboov. Un ok hier liggt dat nääg, dat de Dübel över disse Lüüd lachen ward. Denn, wenn dit Doon vun de Politiker de 'Politikverdrossenheit' noch een Kroon opsetten deit, steiht sien Oahrn good. Wat dorbi rutkummt, hebbt wi al mol beleevt un düer betohlt.

Un to'n Schluß noch een krumm'n Gedanken. In uns Gundgesetz, Artikel 3, heet dat: Alle Menschen sind vor dem Gesetz gleich. Also mööt nu doch de Lüüd, de uns regeert, ok een Gesetz op den Weg bring'n, dat nich blots mien Rente, also mien Inkaam'n, sonnern ok den Monatslohn vun ehrliche Arbeitslüüd, um 1700,- Euro roppsetten deiht, wenn de niede Diätenreform vör dat Verfassunggericht bestohn schall.