Geschrieben im Jahre 2003
Dat gifft een Dutten besonnere Daag in't Johr de uns op irgendeen Saak
oder Problem henwiesen schüllt.
In Oktober to'n Bispill hebbt wi den 'Weltspartag. Spaar in de Tied, denn
hest du in de Not, is een ollen Snack de wi in de Kinnertied lehrnt hebbt.
Un dat schall uns disse Dag wohl ok segg'n.
Wat aver kann oder schall so een 'Weltspartag' de Menschen segg'n, de
alle Daag vun de Hand in den Mund leevt un an vele Daag in't Johr nich
mol satt to eeten hebbt?
Nu, doröver natodenken is nich de Saak vun de Banklüüd.
Dorför weer ansik je een 'Welttag gegen Hunger, Verbreken un Krieg'
tostännig. Blots, de gifft dat nich.
Aver dat maakt ok nix. Wi hebbt den je den 17. Oktober. Dat is 'der
internationale Tag für die Beseitigung der Armut'. Un denn gifft
dat ok noch een Welternährungstag. Höört sik fein an. Beide
Daag laat hoffen. Alleen wat hebbt se bither beschickt? Noch ward de Hunger
in uns Welt alle Daag grötter. Un solang in Europa vele dusend Hektar
best Ackerland brach liggt un de EG dat Gemüse tonnenwies op den
Mist smieten deiht, um de Priese to drieben, sünd solche Daag doch
de blanke Hohn.
Aver doröver henweg hebbt wi noch een Dutten internationale Daag,
de op de groten Probleme in uns Welt henwiesen schüllt.
An 29. September hebbt wi to'n Bispill 'den internationalen Tag der Solidarität
mit dem palästinensischen Volk. Ok dat höört sik good an.
Alleen, wo blifft de Solidarität wenn man süht, wat alle Daag
in Palästina passeert.
De 8. März aver is 'der Tag für den Weltfrieden'. Man blots
een Dag in't Johr vör den Freden in de Welt, is dat genoog? Oder
is de Dag ok blots as Feigenblatt un Ventil dacht? Denn Krieg is för
bestimmte Lüüd doch een Mordsgeschäft un bombenseker. Un
de laat sik nich in't Handwark fuschen!
Un denn hebbt wi dor noch 'den Tag für die Menschenrechte,
den Tag für die Poesie, den Tag für die älteren Menschen,
den Tag der Toleranz, un, dat is doch nich to gläuben
ganz frisch op den Markt: 'Den Welttag für das Ei' und den Welttag
der Toiletten. Tscha, dor fehlt mi de Wöör un ik kann blots
fragen: Sünd de Lüüd, de sik sowat utdenkt, noch recht
kloog in Kopp?
Slaapt se alltohoop an 10. Oktober, de as 'Welttag für die geistige
Gesundheit' anseggt is.
Doch dormit nich genoog. Dat gifft ok noch Gedenk-Weken. In Oktober 2002
to'n Bispill, as wi, 'die Woche der Abrüstung' harrn, hebbt de
Bushmänner weltwiet so dull mit de Säbel rasselt, dat de Menschen
angst un bang worrn is. Un dat to recht, as wi vundaag weten doot.
Aver ok Gedenk-Johr'n hebbt wi. 2003 is 'das Jahr des Trinkwassers'.
Wat nu noch fehlt is de Dag, de Week oder 'das internationale Jahr der
ehrlichen Politiker'. Weer doch scheun, wenn de Lüüd dor boven,
statt dumme Snutensnackeree ok mol een ehrlich Wort segg'n dään.
Un wenn se blot an een Dag in't Johr de Wohrheit un nix as de Wohrheit
seggt:
Dat weer denn doch al een 'Tageserfolg' vun 100%.
Ja, und dorum bün ik dorför, dat wi dat nächste Johr, as
'das internationale Jahr der ehrlichen Politiker' utropen ward. Dat kunn'n
wi doch mol doon. Richten deiht sik doch keeneen dorna.
|